乐姓，百家姓列第八十一，读音为“越”。

乐是个小姓，勒姓氏排行榜浪名列第299位，占全国人口总数个0.014%左右。人数虽然少，历史浪个名人却勿少，譬如有燕国名将乐毅。乐毅，战国后期杰出个军事家，公元前284年，伊统帅燕等五国联军攻打齐国，连牢攻克70余城，创造了中国古代战争史浪以弱胜强个著名战例。还有三国时期魏国个大将乐进，是曹操部下个猛将，擅长打仗，与张辽共破孙权，战功老多。伊拉个姓侪读“越”。

勒姓氏里，也有读“落”个，像著名个漫画家乐小英，夜报浪以前经常有伊个插画。江苏卫视有主持人乐嘉，侪读”落”。

我有个朋友乐姐，迭个姓拨伊带来了好心情，尤其是逢年过节，伊个收获是最多个，因为大家侪讲“节日快乐”“生日快乐”，伊也“乐见其成”整天拿“乐”挂勒自家个嘴巴浪。

查《辞海》，发觉搿个字有4个读音，除脱仔刚刚讲个“越”、“落”，还可读“药”搭仔”落”，比方讲“仁者乐山，智者乐水”。当然，现在也有人读“仁者乐山，智者乐水”个，也勿好算错。

由于迭个字读音复杂，民间还有一个传说：有一个书生，名字是三个乐，中了状元，金榜题名以后，是要见皇帝个。太监先喊“宣乐乐乐（lè）上殿”，没人应答；后首来又喊“乐乐乐（yuè）上殿”，也没人睬伊；再喊“乐乐乐（yào）上殿”，还是没人答应，皇帝就勿开心了。旁边个主考官快点上来讲，伊叫乐（yào）乐（lè）乐（yuè），迭能一喊末，搿个人就上来讲了：“是我”。㑚看，迭个字有意思伐。

我个哀个朋友乐姐，生性乐观，开朗，但是啊，有一趟就因为迭个姓个原因，一点也快乐勿起来了，还多了勿少烦恼。3年前头，乐姐夫妻搭朋友一道到埃及去旅游，大家兴冲冲赶到机场，乐姐却是无法登机，原来旅行社拨机场方面个姓名信息写成了yuè，而乐姐个护照浪个姓是le，虽然汉字是同样个，但是汉语拼音勿一样啊，人家外国人勿认得好！乃么快点问领队，领队讲，阿里个环节出问题，就阿里个环节负责。领队提出解决个方案去，要么让乐姐一家头乘下一班飞机到埃及会合，显然，搿是勿能接受个；要末买当班飞机个公务舱，机票要毛4万块，领队讲没带信用卡，乐姐个老公就刷了卡。勒公务舱，乐姐接一面接受贵宾式个服务，一面心里向“搭搭动”。等到旅行结束，搭旅行社办理报销公务舱机票费用个辰光，对方只肯承担一半费用，理由是乐姐自家没核对清爽信息（事实浪是乐姐60多岁个人根本就勿懂汉语拼音呀），好几趟沟通以后，对方最后愿意承担80%个费用，但乐姐自家还要付脱将近8000块洋钿。

乐姐讲，当时辰光，还真是有眼“乐极生悲”个感觉！